المراية من الحاجات اللي مش باخد بالي منها معظم الوقت
النظر فيها بالنسبة لي مجرد ثواني..
نظرة عامة على نفسي من بره..وخلاص
.................
كتير بحس اني بخاف أبص في المراية كأني لو بصيت ليها حتكلمني وحتعاتبني....
على إيه...
معرفش...!!!
.............
بخاف أبص في عيوني...
ببقى عارف قد إيه حشوفها حزينة...
حتى لو من غير سبب معروف...
حتصعب عليا أوي الشاب اللي في المراية دي
بحس كأني معرفهوش...
بمعنى أصح...بنكر معرفته ديماً
.............
هوشايف اللي كل الناس بيعملوه في شكلهم عشان يبانوا أحلى حاجة ملهاش لازمة
عشان هو شايف الناس من جوه...
مش من بره
وعشان شايف إن الأصل هو شكلنا العادي مش صورتنا اللي بنحاول نرسمها بالألوان قدام الناس
أصله طول عمره بيحب الأبيض وأسود
قديم أوي....
كل الناس شافينه كدة..
احساسه قديم..
كلامه قديم..
هو جه في زمن غلط أصلاً
كأن حد جابه من زمانه وحبسه جوه مراية في زماننا ده ومرضاش يطلعه..
ففضل..جوه..بصورته الحزينة ديماً..مش عارف يهرب ولا يتحرك
..................................
...........
بتلومني كتير..
انت ليه بتهرب مني؟؟؟
وأقوله سامحني....
أصلي أنت محبوس جوه...
لكن...
أنا براك ومحبوس برضه...!!
أنت مقتنع بإحساسك وزمنك اللي جيت منه...
لكن......
أنا....
كتير باجي على احساسي وأفكر بعقلي
عشان عارف أنه هو الصح...
.........
بشوفك جوه دموعك نازل....
ببصلك وأرسم ابتسامة علي وشي
وضحكة تبين لكل الناس إني مبسوط
...............
احنا شبه بعض أوي علي فكرة
انتي صحيح ديماً لوحدك ....
لكن أنا حواليا كل الناس
"من بره"
..........
بنحب بعض كمان لكن كل حاجة بتفرقنا
الازاز اللي بيننا أكبر حاجز نفسك تكسري وتطلع تدخل جوايا
وأنا....
أنا خايف ينكسر وتنكسر صورتي
وأجي في لحظة
أتقسم اتنين
ومعرفش أنا مين
من مدونة نهر الحب
ليست هناك تعليقات:
إرسال تعليق